Ef þú gætir valið starfsferil barns þíns við fæðingu, myndirðu gera það?

Hugsaðu þér aðstæður þar sem þú gætir valið úr genum sem gera barnið líklegra til að ná hæfileika á ákveðnum sviðum, t.d. læknagen, lögfræðigen, heimspekigen, sálfræðigen, kennaragen, sölumannsgen, osfrv.

Ef þú vildir geta valið þannig framtíð barnsins, og gætir það, hvernig framtíð myndir þú velja því?

 

 

Mynd: Archdiocese of San Francisco, Office of Public Policy and Social Concerns

Fyrir hverjum í þessum heimi berðu mesta virðingu?

Hvað er það nákvæmlega í fari hennar/hans sem þér finnst svona merkilegt?

Besti íslenski sönglagatextinn - tillögur óskast

Hægt og hljótt

Kvöldið hefur flogið alltof fljótt
Fyrir utan gluggann komin nótt
Kertin er' að brenna upp
Glösin orðin miklu meir'en tóm

Augnalokin eru eins og blý
En enginn þykist skilja neitt í því
Að timinn pípuhatt sinn tók
Er píanistinn sló sin lokahljóm
      
Við hverfum hægt og hljótt, út í hlýja nóttina
Hægt og hljótt, göngum við heim götuna
Einu sinni, einu sinni enn
      
Eftir standa stólar, bekkir, borð
Brotin glös, sögð og ósögð orð
Þögnin fær nú loks sinn frið
Fuglar yrka nýjum degi ljóð
      
Við hverfum hægt og hljótt, út í hlýja nóttina
Hægt og hljótt, göngum við heim götuna
      
Hægt og hljótt, göngum við heim götuna
Hægt og hljótt, í gegnum hlýja nóttina
Einu sinni, einu sinni enn

 

Höfundur: Valgeir Guðjónsson

Þetta lag hefur verið í miklu uppáhaldi hjá mér frá því Halla Margrét söng það fyrst árið 1987. Nú hefur dóttir mín einnig uppgötvað þetta lag og finnst jafnmikið til þess koma. Ég er sérstaklega hrifinn af lögum sem hafa góða og einlæga texta.

Getur þú stungið upp á góðu íslensku lagi eða lögum með einstaklega fínum texta?

Er til eitthvað íslenskt lag með betri texta og betur flutt en Hægt og hljótt? 

 

Tillögur um besta textann:

Hægt og hljótt	Valgeir Guðjónsson
Til eru fræ	Davíð Stefánsson
Syneta	Bubbi Morthens
Losing every day	Dikta
It's True	B.sig
Hoppípolla	Sigur Rós
Einn á ísjaka	Langi Seli og Skuggarnir
Ástin vex á trjánum	Valgeir Guðjónsson
Flugvélar	Björn Jörundur
Ertu ekki alltof bissí krissí	Bjartmar Guðlaugsson
Lifi ljósið	Hárið
Jesús Kristur og ég	Vilhjálmur frá Skálholti
Þrek og tár	Guðmundur Guðmundsson
Söknuður	Vilhjálmur Vilhjálmsson
Bahama	Veðurguðirnir
Álfheiður Björk	Nýdönsk
Hjálpaðu mér upp	Nýdönsk

Hvort viltu frekar ná frábærum árangri í atvinnulífinu eða einkalífinu?

 

Segjum að þú verðir að velja á milli þessara tveggja kosta:

 

1. Að ná gríðarlega góðum árangri í atvinnulífinu, en lifa á sama tíma leiðinlegu einkalífi

2. Að vera gríðarlega hamingjusamur í einkalífinu, en vera í óspennandi vinnu

 

Hvort myndir þú velja eða hefurðu kannski þegar valið og lifir eftir því?

 

 

Mynd: jPOS.org

Hver er Chuck Norris? - Fyndnustu frasarnir að hans eigin mati -

Á sama tíma og Stallone og Schwarzenegger voru konungar b-hasarmynda, var Chuck Norris [Carlos Ray Norris] (fæddur 10. mars 1940) konungur d-hasarmynda, en Van Damme var þá kóngur c-hasarmynda. Mér var sama um gæðin. Ég horfði á þetta allt.

Chuck Norris skaust upp á stjörnuhimininn þegar hann lék aðal fjandmann Bruce Lee í Way of the Dragon (Meng Long Guo Jiang) árið 1972. Samt fór ferill hans ekki almennilega í gang fyrr en í kringum 1980 með myndum eins og Good Guys Wear Black (1978), A Force of One (1979), Missing in Action (1984), Invasion U.S.A. (1985), og The Delta Force (1986). 

Sögufléttan var alltaf eins. Einhver illmenni drápu einhvern eða einhverja sem voru nánir Chuck Norris, og hann hefndi sín á þeim með öllum tiltækum ráðum, fyrst og fremst sem mikill bardagalistamaður sem gat drepið óvinina með berum hnefum, sem voru yfirleitt örlög aðal fjandmannsins, og notaði önnur vopn til að losa sig við undirmenn foringjans. 

Það var mikið drepið í þessum myndum, og ég játa að ég hafði lúmskt gaman af þeim, og leigði Chuck Norris myndir sem unglingur, einfaldlega af því að Chuck Norris var flottastur. Frægðarsól Chuck Norris settist um tíma, en er nú farin að skína aftur á svolítið skemmtilegan hátt. 

Búinn var til listi yfir hnyttnustu hækileika Chuck Norris, og það eru til keppnir þar sem verðlaunin felast í að komast inn á topp 11 listann. Þannig að frasarnir um ofurhetjuhæfileika Chuck Norris eru í dag óendanlega langir, og sífellt verið að bæta við nýjum frösum. Þetta er svona eins og ljóðasamkeppni, þar sem þarf að dásama Chuck Norris á einhvern hátt.

Eftirlætis frasar Chuck Norris eru þessir (hann valdi þá sjálfur):

1. Þegar skrímsli fara að sofa á kvöldin, athuga þau hvort að Chuck Norris feli sig nokkuð í skápnum.
2. Chuck Norris les ekki bækur. Hann horfir ógnandi á þær þar til hann fær þær upplýsingar sem hann vill.
3. Þróunarkenningin stenst ekki. Sannleikurinn felst í lista Chuck Norris yfir þær lífverur sem fá að lifa.
4. Geimurinn er til vegna þess að hann er hræddur við að vera á sömu plánetu og Chuck Norris.
5. Chuck Norris sefur ekki. Hann bíður.
6. Chuck Norris fór í höfundarréttarmál við Bubba þar sem hann notaði í óleyfi nafnið á hægri og vinstri fót Chuck Norris: Lög og Regla.
7. Chuck Norris er ástæða þess að Valli er alltaf í felum.
8. Chuck Norris hefur talið upp að óendanleikanum. Tvisvar.
9. Það er engin kinn undir skeggi Chuck Norris. Bara annar hnefi.
10. Þegar Chuck Norris tekur armbeygjur, lyftir hann ekki sjálfum sér, heldur þrýstir hann jörðinni niður.
11. Chuck Norris er svo fljótur að hann getur hlaupið í kringum jörðina og kýlt sig í hnakkann.
12. Hönd Chuck Norris er eina höndin sem getur sigrað háspilaröð.
13. Chuck Norris getur leitt hest að vatni OG látið hann drekka.
14. Chuck Norri er ekki með klukku. Hann ákveður hvað klukkan er.
15. Chuck Norris getur skellt veltihurð.
16. Chuck Norris verður ekki kalt af frosti. Frostinu verður kalt af Chuck Norris.
17. Manstu eftir Sovétríkjunum? Þau ákváðu að hætta eftir að þau sáu Chuck Norris í Delta Force.
18. Bandaríkin eru ekki lýðræði. Þau eru Chuckræði.

Hægt er að finna endalausan fróðleik um Chuck Norris frasa á vefsvæðinu Chuck Norris Facts.

 

Þessi færsla er tileinkuð Guðríði Haraldsdóttur, sem hefur verið að birta Chuck Norris frasa á Moggablogginu.

Myndir: ChuckNorris.fr og Chuck Norris - The Picture Encyclopedia of Cultural Images

The Dark Knight (2008) ***1/2

The Dark Knight er vel gerð ofurhetjumynd, með flóknu samspili ólíkra persóna, afar góðri frammistöðu nokkurra leikara, með sögu í anda teiknimyndasagnanna og vel leikstýrð. Hún er hins vegar ekki besta kvikmynd sem gerð hefur verið, né get ég fullyrt að hún sé besta ofurhetjumyndin. Hún er bara öðruvísi en allar aðrar ofurhetjumyndir að því leyti að veruleiki hennar passar við okkar veruleika.

The Dark Knight er heldur köld kvikmynd fyrir minn smekk. Hún er svona hálfpartinn Blade Runner (1982) og hálfpartinn Heat (1995), Það hefur bæði kosti og galla. Það eru það margar persónur drepnar að þegar loksins ein af aðalpersónunum fellur í valinn, þá hefur maður upplifað svo mikið ofbeldi og svo margar aukapersónur verið drepnar að mér fannst persónulegt drama frekar lítilvægt þegar þar var komið sögu. 

Heath Ledger hefur verið mikið rómaður fyrir leik sinn sem The Joker. Hann á þetta lof að mestu skilið, leikur hans ógleymanlegur og honum tekst að færa persónu dýpt sem virðist ekki eiga sér neina forsögu. Hann er lunkinn við að koma hetjunum í mikil vandræði og dáist að Batman eins og fanatískur aðdáandi og þráir ekkert meira en að Batman drepi hann, sem stríðir reyndar gegn siðareglum Batman, og það sem gerir þetta að svona spennandi leik fyrir The Joker.

Tvær fylkingar takast á í The Dark Knight: annars er það mafían eins og hún leggur sig og lögreglan og saksóknarar gegn henni. Einhvers staðar á milli þessara tveggja fylkinga eru svo hetjurnar Batman, Jim Gordon og Harvey Dent, en hinu megin við línuna eru svo illmennin The Joker og Two Face.

Munurinn á Batman og The Joker er áhugaverður, en Batman trúir því að hann sé að verja saklaust fólk gegn illmennum. The Joker aftur á móti trúir því að enginn sé saklaus, að allir séu illir, og hann hefur djúpa þrá fyrir að sanna þessa kenningu sína með því að spilla öllu því sem gott er.

Á Heath Ledger skilinn Óskar fyrir túlkun sína sem The Joker? Miðað við Óskarinn síðustu ár þá held ég að það sé nokkuð gefið að hann verði tilnefndur, hann er það sannfærandi í sínu hlutverki, en Aaron Eckhart þótti mér hins vegar enn betri sem Harvey Dent, þó að ég ætti erfitt með að trúa á dramatískan viðsnúning hans.

Christian Bale fannst mér hins vegar slakur í titilhlutverkinu. Sem Bruce Wayne sýndi hann litla mannúð, og sem Batman var hann með rödd sem var alltof rám og alvarleg miðað við aðstæður, sérstaklega þegar hann var að ræða við vini sína. Michael Caine er afbragð sem þjónninn Alfred, og Morgan Freeman er bara Morgan Freeman í hlutverki Lucius Fox, og Maggie Gyllenhaal er framför frá Katie Holmes sem saksóknarinn og æskuvinur Bruce Wayen og auk þess forsenda ástarþríhyrnings: Rachel Dawes. Gary Oldman er mjög góður sem þungamiðja réttlætisins, Jim Gordon.

Öll bardagaatriði og kappakstur eru hreint afbragð, og finnst mér einfaldlega súrt að ekki skuli vera til IMAX bíó á Íslandi þar sem mikill hluti myndarinnar var hannaður fyrir þá tækni. Sjálfsagt er það hluti af ástæðu þess að hún er að fá svona magnaða dóma í Bandaríkjunum.

Reyndar hafði ég á tilfinningunni í upphafi sýningarinnar að upplausnin á myndinni væri vitlaust stillt í Kringlubíói. Það er samt erfitt fyrir mig að meta það, þar sem ég hef ekki séð myndina við bestu mögulegu aðstæður. 

The Dark Knight er tveir og hálfur tími að lengd, en sá tími er fljótur að líða því maður er alltaf spenntur eftir því sem gerist næst, og reyndar þegar myndinni lauk langaði mig enn til að sjá meira.

Ég get ekki gefið The Dark Knight fulla einkunn þar sem að mér þótti persónurnar of fjarlægar, og held að þær hefðu getað verið enn betur mótaðar. Það getur reyndar verið að einhverjar mikilvægar senur hafi verið klipptar úr myndinni af framleiðendum vegna lengdar og að endanlega útgáfa leikstjóra muni einhvern tíma koma út með þessum atriðum sem mér fannst vanta.

Ég get mælt með The Dark Knight en með þeim fyrirvara að þú skalt ekki búast við alltof miklu. Hún er engan veginn besta mynd allra tíma eins og hægt er að sjá á IMDB þessa dagana, en ætti hugsanlega skilið að vera á topp 20-50 yfir bestu Hollywoodkvikmyndir sem gerðar hafa verið.

Ef þig langar til að sjá The Dark Knight bara til að sjá frammistöðu Heath Ledger, þá verðurðu ekki fyrir vonbrigðum, því að hann er óþekkjanlegur, djúpur og snarklikkaður í sínu hlutverki - það bilaður að maður veltir fyrir sér hvort að hlutverki hafi tekið það á, að það hafi átt einhvern þátt í dauða hans.

Þó að þetta sé töluvert löng gagnrýni, þá er ég búin að taka The Dark Knight fyrir af meiri dýpt á seenthismovie.com.
 

Leikstjóri: Christopher Nolan

Einkunn: 8

 

 

Myndir: Rottentomatoes.com

 

33 fyndin prófsvör

Ég veit að þetta asnast svolítið til í þýðingu, en lestu og brostu. Flest brosin verða til út frá þessum alltof stóru orðum sem ekki er auðvelt að skilja í fyrstu atrennu. Þetta er fyndnara ef við sleppum útskýringum. 

 

1. Í Egyptalandi hinu forna var múmíubyggð mikil og þær skrifuðu allar straumfræði. Þær bjuggu í eyðimörk Söru og ferðuðust um á Kamelot. Hitastigið á Söru var þvílíkt að íbúarnir þurftu að búa annars staðar.

2. Biblían er full af áhugaverðum persónum. Í fyrstu bók Biblíunnar, Ginness, voru Adam og Eva búin til úr eplatré. Eitt barna þeirra, Kain, spurði: "Er ég sonur bróður míns?"

3. Móses leiddi hebresku þrælana yfir Rauðahafið, þar sem þeir gerður sér ólyft brauð sem er brauð gert án hráefna. Móses fór upp á Blásýrufjall til að sækja boðorðin tíu. Hann dó áður en hann komst nokkurn tíma til Kanada.

4. Salómon átti þrjúhundruð eiginkonur og sjöhundruð broddgelti

5. Grikkirnir voru vel höggvið fólk og án þeirra ættum við okkur enga sögu. Grikkir höfðu líka goðsögur. Goðsaga er kvenkyns mölfluga.

6. Í raun og veru þá voru Hómerskviður ekki skrifaðar af Hómer, heldur af öðrum manni sem hafði sama nafn.

7. Sókrates var frægur grískur kennari sem var duglegur að gefa fólki ráð. Það drap hann. Sókrates dó eftir ofnotkun á eitri. Eftir dauðann varð dramatísk hnignun í starfsferli hans.

8. Á Ólympíuleikunum kepptu Grikkir í kapphlaupi, stökki, köstuðu kexkökum og kaffibaunum.

9. Loksins höfðu Rómverjar sigrað Grikki. Sagan kallar fólk Rómverja af því að þeir voru aldrei lengi á sama stað.

10. Júlíus Cesar slökkti á sjálfum sér á bardagavöllum Gaulverja. Ides frá Mars myrti hann af því að þeir héldu að annars yrði hann kóngur. Deyjandi, stundi hann: "Tí hí, Brútus."

11. Neró var grimm harðstjórn sem myndi pynta þegna sína með því að spila á fiðlu fyrir þá.

12. Jóhanna af Örk var brennd til steikar og var gerð að dýrlingi af Bernard Shaw. Loksins kom Magna Carta út sem bannaði að hengja sömu manneskju tvisvar fyrir sama afbrot.

13. Á miðöldum voru flestir ólæsir. Mesti rithöfundur tilgangslausu aldanna var Chaucer, en skrifaði mörg ljóð og erindi og líka bókmenntir.

14. Önnur saga segir af Vilhjálmi Tell sem skaut ör gegnum epli á meðan hann stóð á höfði sonar síns.

15. Elísabet drottning var "Jómfrúardrottningin". Sem drottning náði hún miklum árangri. Þegar hún afklæddi sig fyrir framan hermenn sína hrópuðu þeir "húrra!"

16. Þetta var tími mikilla uppgötvana og uppfinninga. Gutenberg fann upp á fjarlægjanlegu letri og Biblíunni. Önnur mikilvæg uppfinning var hringrás blóðsins. Sir Walter Raleigh er sagnfræðilega mikilvægur af því að hann fann upp á sígarettum og byrjaði að reykja. Og Sir Francis Drake umskar heiminn með 100 feta skærum.

17. Mesti rithöfundur endurreisnarinnar var William Shakespeare. Hann fæddist árið 1564, á fæðingardegi sínum segja þeir. Hann vann sér aldrei inn mikinn pening og er bara frægur út af leikritum sínum. Hann skrifaði harmleiki, gamanleiki og legfjarlægingar, allt með íslömskum hrynjanda. Rómeó og Júlía eru dæmi um hetjupar. Hinsta ósk Rómeós var að gera það með Júlíu.

18. Miguel Cervantes skrifaði á sama tíma og Shakespeare. Hann skrifaði Donkey Hote. Næsti frábæri rithöfundur var John Milto. Milto skrifaði Paradís týnd. Þá dó konan hans og hann skrifaði Paradísarheimt.

19. Ameríka byrjaði í endurreisninni. Kristófer Kólumbus var mikill siglingamaður sem uppgötvaði Ameríku á meðan hann sigldi yfir Atlantshafið. Skipin hans voru kölluð Nína, Pínta og Santa Fe.

20. Seinna fóru pílagrímarnir yfir hafið og var það kallað Framför Pílagrímanna. Veturinn 1620 var erfiður fyrir landnemana. Margir dóu og mörg börn fæddust. John Smith skipstjóri bar ábyrgð á þessu öllu saman.

21. Ein af ástæðum bandarísku byltingarinnar var að Englendingar settu takka í teið sitt. Þar að auki sendu landnemarnir pakka með pósti án þess að borga póstburðargjöld. Loks unnu landnemar stríðið og þurftu ekki lengur að borga skatt. Fulltrúar frá hinum upprunalegu 13 ríkjum formuðu hið Ánægða Þing. Thomas Jefferson, hreinn sveinn, og Benjamin Franklin voru tveir af þeim söngvurum sem sungu Sjálfstæðisyfirlýsinguna. Franklin uppgötvaði rafmagn með því að nudda tveimur köttum afturábak og sagði, "Hestur deildur með sjálfum sér getur ekki staðið." Franklin dó árið 1790 og er ennþá dauður.

22. Fljótlega var stjórnarskrá Bandaríkjanna notuð til að tryggja fjandmennsku heima. Undir stjórnarskránni hlaut fólk rétt til að ganga um með bera handleggi.

23. Abraham Lincoln varð mesta fordæmi Bandaríkjanna. Mamma hans dó í æsku, og hann fæddist í viðarskúr sem hann hafði byggt með eigin höndum. Abraham Lincoln frelsaði þrælanda með því að skrifa undir Tilskipun um afskurð kynfæra. Kvöldið 14. apríl 1865 fór Lincoln í leikhús og var skotinn í sæti sínu af einum leikaranna í kvikmynd. Tilræðismaðurinn var John Wilkes Booth, geðveikur leikari. Þetta gjöreyilagði feril Booth.

24. Á meðan í Evrópu, var upplýsingin sanngjarn tími. Voltaire fann upp á rafmagninu og skrifaði líka bók sem hét Sælgæti.

25. Isaac Newton fann upp þyngdaraflið. Það er sérstaklega auðvelt að verða var við það á haustin þegar eplin fara að falla af trjánum.

26. Johann Bach samdi mörg stórfengleg tónverk og átti gríðarlegan fjölda af börnum. Á meðan æfði hann sig á gamalli þernu sem hann geymdi uppi á háalofti. Bach dó frá árinu 1750 til dagsins í dag. Bach var frægasta tónskáld heims og líka Handel. Handel var hálf þýskur, hálf ítalskur og hálf enskur. Hann var mjög stór.

27. Beethoven samdi tónlist þrátt fyrir að vera heyrnarlaus. Hann var svo heyrnarlaus að hann samdi háværa tónlist. Hann fór í langa göngutúra um skóginn jafnvel þó að allir væru að kalla á hann. Beethoven gaf upp öndina árið 1827 og dó seinna vegna þess.

28. Franska byltingin tókst áður en hún gerðist og skaust inn í Napóleon. Napóleon vildi fá erfingja til að erfa vald hans, en þar sem Jósefína var kapall gat hún ekki eignast börn.

29. Sólin settist aldrei á breska heimsveldið af því að breska heimsveldið er í austri en sólin sest í vestri.

30. Viktoría drottning var lengsta drottningin. Hún sat á þyrni í 63 ár. Hún var siðleg kona sem æfði dygð. Dauði hennar var síðasti atburðurinn sem lauk veldi hennar.

31. Nítjánda öldin var tími margra stórfenglegra hugsana og og uppfinninga. Fólk hætti að fjölga sér með handafli og byrjaði að fjölga sér með vélum. Uppfinningin á gufubátnum varð því valdandi að net fljóts spratt upp. Cyrus McCormick fann upp á McCormick nauðgaranum, sem vann vinnu mörg hundruð manna.

32. Louis Pasteur uppgötvaði lækningu fyrir gyðingapresta. Charles Darwin var náttúrusinni sem skrifaði Líffæri Tegundanna. Brjálaði Curie fann upp á útvarpi. Og Karl Marx varð einn af Marx bræðrum.

33. Fyrsta heimstyrjöldin, sem var orsökuð af tilskipun aðalandar af stjórnleysingja, kom inn nýrri villu í rassgöt mannkynssögunnar.

 

Hálfbein þýðing af síðunni The List Universe: Lists with a twist - 33 Funny Exam Answers

Fer á The Dark Knight í kvöld

Í kvöld kemst ég að því hvort að The Dark Knight sé jafn mögnuð og gagnrýnendur að utan segja, en hún hefur slegið öll aðsóknarmet í Bandaríkjunum og er langhæst á topp 250 lista Internet Movie Database, með 9.6 í einkunn frá 69.135 notendum sem gefa kvikmyndum reglulega einkunn. 

Ég skrifa síðan gagnrýni á morgun og birti hér á blogginu, sérstaklega fyrir einn lesanda sem óskaði eftir að ég færi á frumsýningu til að flytja mínum traustu lesendum dóminn.

Vissulega fer maður svolítið litaður á þessa mynd í kvöld, þar sem að hún hefur verið alltof mikið lofuð, og ég veit að það getur haft áhrif á skoðanir mínar, en ég geri mitt besta til að sjá myndina án þess að dæma hana fyrirfram af of mikilli hörku.

Vanmáttur mannsins gegn náttúruskrímslinu: þegar við lentum í fellibyl á Yucatanskaganum

 

Haustið 2002 ruddist fellibylurinn Ísídór yfir heimili mitt og borgina Merida í Yucatan. Ég og mín fjölskylda töpuðum aleigunni, og hundinum, en skóli sem við höfðum reist var lagður algjörlega í rúst af þessu ógurlegasta skrímsli sem ég hef komist í námunda við.

Daginn áður en fellibylurinn skall yfir hafði ég á tilfinningunni að eitthvað lægi í loftinu. Við fórum í dýragarðinn með börnin, og fréttum af starfsmönnum þar að allir apar, fyrir utan górillurnar, höfðu flúið úr garðinum. Þeir komu til baka eftir að fellibylurinn hafði rústað borginni.

Ég vissi ekki hvað fellibylur var. Hélt þetta væri í mesta lagi ofsarok eins og stundum er á Íslandi, en það reyndist vanmat. Ég límdi fyrir alla glugga, en þeir brotnuðu samt í óveðrinu. Ég var nettengdur á þessum sunnudegi og ætlaði að taka þátt í skákmóti sem Taflfélagið Hellir hélt reglulega á Netinu, en kl. 14:55 eða kl. 19:55 að íslenskum tíma, rofnaði netsambandið. Tveimur mínútum síðar fór rafmagnið. Við fengum rafmagnið aftur mánuði síðar.

Í fyrstu leit þetta út eins og rok, en við konan fórum með börnin og hundinn inn í svefnherbergi, sem var gluggalaust, og þar lokuðum við okkur inni með lítið vasaútvarp og vasaljós, en á meðan æstist stormurinn fyrir utan. Mér var hætt að lítast á blikuna þegar ég fór að heyra brothljóðin í gleri og ískrið þegar málmur beyglaðist saman. Eftir 10 tíma fór ég út í glugga og sá þá að allir veggir skóla okkar höfðu lagst saman og rúðurnar þotið út um veður og vind, það rigndi stanslaust eins og hellt væri úr fötu - ljósastaurar og tré lágu á hliðinni úti á götu. Þetta var fyrir utan heimili mitt, og þannig var þetta um alla borg.

Við þurftum að húka inni í 30 tíma, en þá slotaði. Börnin spurðu hvort að fellidrekinn væri farinn í burtu. Skólastofan var með vatni sem náði upp í ökkla, og í vatninu voru glerbrot og drulla. Sjónvarpið, tölvan, skólastofan: allt ónýtt.

Ég man ekki neitt eftir þessum degi, en konan mín segir að ég hafi farið út með sveðju ásamt nágrönnunum og unnið við að höggva fallin tré sem lágu á götunni, til að herinn kæmist að með sitt fólk. Daginn eftir fór ég í klakaverksmiðju sem keyrði á díselolíu, og beið í biðröð átta klukkustundir eftir einum klaka sem ég setti svo í kælibox. Þannig tókst okkar að bjarga mat sem annars hefði eyðilagst í rafmagnslausum ísskápnum. Það var líka vatnslaust, þar sem að pumpur til að ná vatni upp úr brunnum keyrðu á rafmagn, en við höfðum sundlaug í garðinum sem fylltist í fellibylnum og gátum baðað okkur upp úr þessu vatni næstu vikurnar. Einnig tókst okkur að kaupa sextíu lítra af drykkjarvatni, sem dugði okkur í tvær vikur.

Málmgirðingin fyrir utan húsið okkar hafði beyglast upp eins og bananahýði. Hundurinn fór út um hliðið þennan dag og ég hef ekki séð hann síðan. Reyndar frétti ég af honum um daginn, sex árum síðar, og er hann heill heilsu hjá dýralækninum, en þangað hafði hann einhvern veginn ratað. Þar sem að við höfðum ekkert síma- eða netsamband í heilan mánuð á eftir gat dýralæknirinn ekki látið okkur vita.

Það versta við þetta var að geta ekki látið neinn vita heima á Íslandi og sagt fólkinu heima hvað það þýðir að upplifa svona lagað, þar sem að við vorum algjörlega sambandslaus við umheiminn.

Þannig er að upplifa fellibyl.

 

Myndir: 

Gervihnattamynd af Ísídór frá NASA

Yucatan Living

 

Spáð að hitabeltisstormurinn Dolly verði að fellibyl

Hvernig er hin "fullkomna" kvöldstund í þínum huga?

Er það rómantísk kvöldstund, góð bíómynd, leikrit eða listasýning, fallegt sólsetur, vera í faðmi fjölskyldunnar eða vina, eða í myrkrinu með þeirri manneskju sem þú elskar?

Það væri gaman að heyra sögur af hinni fullkomnu kvöldstund...

 

Mynd: Craimark Studios