20 bestu vísindaskáldsögurnar í kvikmyndum, 8. sæti: The Matrix

Í áttunda sætinu yfir bestu vísindaskáldsögurnar í kvikmyndum er mynd sem gengur upp í alla staða: sagan er frjó og skemmtileg, tæknibrellurnar voru byltingarkenndar, slagsmálaatriðin með því flottasta sem maður hefur séð og pælingar þannig útfærðar að maður fær tækifæri til að pæla í eðli eigin þekkingar á heiminum og manni sjálfum.

The Matrix gerist eftir um það bil 100 ár, hugsanlega fleiri eða færri. Vélar með gervigreind ráða yfir jörðinni og aðeins ein mennsk borg stendur eftir: Zion. Allt mannkyn fyrir utan þá sem hafa verið frelsaðir og búa í Zion, sem er staðsett djúpt í iðrum jarðar, þjóna aðeins einum tilgangi fyrir vélarnar: að vera rafhlöður til að knýja heim vélanna.

Manneskjum er haldið sofandi allt sitt líf og þær eru tengdar inn í sýndarveruleika sem er það trúverðugur að flestir trúa að þeir lifi í honum. Ef ekki væri fyrir hóp uppreisnarmanna sem leita að frjálsum sálum í sýndarveruleikanum væri mannkynið glatað. 

Morpheus (Laurence Fishburne) leiðir rannsóknarhóp á könnunarskipinu Nebuchadnezzar í leit að hinum eina sem spáð er að muni geta brotið lögmál sýndarveruleikann. Morpheus hefur augastað á unga tölvuhakkaranum Neo (Keanu Reeves), sem telur sig vera forritara í hugbúnaðarfyrirtæki, en er í raun og veru sofandi djúpum svefni sem batterí á víðum velli sem vélarnar stjórna.

Tölvuforrit að nafni Agent Smith (Hugo Weaving) er helsti óvinur þessara síðustu frelsistilburða mannkyns, og reynir hann að einangra alla þá sem tengjast sýndarveruleikanum að utan og drepa þá, því ef sál þín deyr í sýndarveruleikanum, deyrðu í veruleikanum. Smith hefur ás í erminni þar sem svikari felst í áhöfninni.

The Matrix er spennandi mynd með krefjandi hugmyndir. Sem heimspekikennari kannast ég við ansi margar hugmyndir úr heimspekisögunni, eins og til dæmis hellislíkingu Platóns, hugleiðingar Descartes, eindarhyggju Spinoza, efahyggju, tilvistarhyggju og fleira. 

Ég hef greint The Matrix enn dýpra á Seen This Movie! Smelltu hérna til að kíkja á greinina.

 

8. sæti: The Matrix

9. sæti: Gattaca

10. sæti: Abre los Ojos

11. sæti: The Thing

12. sæti: Brazil

13. sæti: E.T.: The Extra Terrestrial

14. sæti: Back to the Future

15. sæti: Serenity

16. sæti: Predator

17. sæti: Terminator 2: Judment Day

18. sæti: Blade Runner

19. sæti: Total Recall

20. sæti: Pitch Black

Athugasemdir

[Snorri H. Gudmundsson (IP-tala skráð) 6.7.2008 kl. 05:27]

Sælir Hrannar,

Hef ekkert heyrt af þér síðan farið var í stúdentsferð til Tælands 1989.  :o) 

[Ómar Ingi, 6.7.2008 kl. 11:28]

Þú ert alveg á villigötum í þessum lista þínum

[Sigurður Þorsteinsson, 6.7.2008 kl. 12:07]

Hef alveg sérstakt dálæti á blogginu þínu. Haltu áfram!

[Hrannar Baldursson, 6.7.2008 kl. 14:15]

Snorri: blessaður. Stúdentaferð fyrir 19 árum síðan? Þá var ég 19 ára. Við ættum kannski að halda 20 ára veislu á næsta ári, ef við getum fundið okkur aftur?

Ómar: Hehe... Finnst þér Blade Runner virkilega betri en The Matrix? Ég viðurkenni að Matrix Reloaded og Matrix Revolutions eru frekar slakar, en það mengar ekki skoðun mína á upphaflegu myndinni, sem er frábær. 

Sigurður: Kærar þakkir. 

[Ómar Ingi, 6.7.2008 kl. 15:20]

Nei það sagði ég ekki en Báðar myndirnar eiga að vera miklu miklu ofar.

[Georg P Sveinbjörnsson, 11.7.2008 kl. 20:30]

Margar góðar ræmur þarna, en sakna sárlega snilldarmyndarinnar Dark City.

[Hrannar Baldursson, 11.7.2008 kl. 20:42]

Georg: Bíddu bara.

Ómar: Ég gat ekki með góðri samvisku sett þær fyrir ofan snilldirnar sem eru eftir á listanum.

[Georg P Sveinbjörnsson, 11.7.2008 kl. 20:55]

sorrý, sé það núna að 7 efstu sætin eru eftir