Íslenskt réttlæti: Erum við að borga alltof mikið í skatta og af lánum vegna bankarána og skattsvika sem við botnum ekkert í?

 

Bankarán virðast vera orðin að leið til farsældar á Íslandi. Bankaræningjar og skattsvikarar í dag vopnast ekki bareflum eða skotvopnum, heldur hátæknimiðlum sem venjuleg manneskja botnar ekkert í. Fáir einstaklingar geta hrært í íslenska bankakerfinu til þess að hagnast á hræringunum,. Þeir eru hvítflibbamenn, en ekki hvítflibbaglæpamenn, því ekki hefur komist upp um þá, né þeir sakfelldir enn, og ólíklegt að slíkt muni nokkurn tíma gerast.

Fullyrt hefur verið af Seðlabankastjóra og fleirum að slíkt hafi verið gert. Samt er ekkert gert í málinu, annað en að hækka stýrivexti, lækka krónuna, hækka verð á nauðsynjavörum og lækka íbúðarverð. Þetta eru allt breytingar sem koma meirihluta Íslendinga afar illa. Af hverju er ekkert gert í málinu?

Samkvæmt upplýsingum frá saksóknara efnahagsbrota hjá ríkislögreglustjóra frá síðasta sumri réð efnahagsbrotadeild ríkislögreglustjóra ekki við að rannsaka sakamál hvítflibba og eltast við hvítflibba vegna skorts á fjármagni. Síðan þá hefur deildin misst tvo starfsmenn og fjármagn til deildarinnar hefur ekki verið aukið eins og þörf var á.

Athyglisvert er að á sama tíma hefur verið bætt við fjármagni í baráttu gegn almennum glæpum, glæpum sem fjölgar í öllum þeim samfélögum þar sem fólk upplifir samfélagslegt óréttlæti og mismunun.  

Þetta gefur fólki með hugmyndir um að sækja sér pening á ólöglegan hátt úr kerfinu aukin skotfæri. Það veit að enginn mun rannsaka málið og að það mun komast upp með nánast hvað sem er, það þarf aðeins að hylja slóðina lítillega og þá er þetta komið.

Hver borgar á endanum fyrir þessi brot, sem geta snúist um að hræra í gjaldeyrismarkaðnum til að maka eigin krók eða svíkja undan skatti? Jú, það er hinn almenni borgari sem er sekur um það eitt að standa við skuldbindingar sínar og borga sína skatta og lán. Málið er að eftir því sem ránsféð er hærra, og eftir því sem þessi rán aukast, því meira þarf borgarinn að borga.

Svo ég leyfi mér að semja eina samsæriskenningu sem ég hef ekki hugmynd um hvort að nokkuð sé til í: Er mögulegt að efnahagsbrotadeild ríkislögreglustjóra sé ekki að fá aukin fjárráð vegna spillinga og mútumála, sem eru mál sem viðkomandi deild heldur utan um?

 

Bankarán eins og þau gerast ekki í dag:

Færri rannsaka hvítflibbana

Athugasemdir

[Ómar Ingi, 12.4.2008 kl. 11:10]

Góðar og hollar pælingar Don

[Kjartan Pétur Sigurðsson, 12.4.2008 kl. 21:57]

Það skyldi þó ekki vera að það sé eitthvað til í því sem þú ert að skrifa hér.

[Georg P Sveinbjörnsson, 12.4.2008 kl. 22:23]

Alls ekki fráleitt að velta þessu fyrir sér.

[Jóna Kolbrún Garðarsdóttir, 13.4.2008 kl. 02:49]

Fróðleg lesning, auðvitað borgar þessi almenni bankaviðskiptavinur.  Fitkostnaður, seðilgjöld og ýmisskonar tilbúinn kostnaður er raunveruleiki margra í dag.

[Óskar Arnórsson, 13.4.2008 kl. 17:48]

Megapóker er flókið mál. Það er ekki alltaf sem er með sterkustu spilin á hendi sem vinnur! þó maður sé með fjóra Ása í hendi, gefur maður pottinn sé skammbyssu miðað á mann hversu mikið sem er mikið í pottinum. Óþægileg tilfinning þetta....

"Svo ég leyfi mér að semja eina samsæriskenningu sem ég hef ekki hugmynd um hvort að nokkuð sé til í: Er mögulegt að efnahagsbrotadeild ríkislögreglustjóra sé ekki að fá aukin fjárráð vegna spillinga og mútumála, sem eru mál sem viðkomandi deild heldur utan um?"

Tek undir þessa athugasemd þó hún sé hættuleg...