The Incredible Hulk (2008) ***

Bruce Banner (Edward Norton) starfar við gosdrykkjaframleiðslu í Brasilíu þegar hann sker sig og dropi af blóðinu hans ógurlega lendir ofan í gosflösku sem síðar er flutt til Bandaríkjanna. Þegar Ross hershöfðingi (William Hurt) berast fréttir um undarleg áhrif gosflöskunnar lætur hann rekja hana til verksmiðjunnar og sendir hóp þrautþjálfaðra hermanna á staðinn. Meðal þeirra er harðjaxlinn Blonsky (Tim Roth) sem hefur hreina unun af bardagalistum og getur varla beðið eftir að fá verðugt verkefni. Þetta verður til þess að Banner þarf að leggja á flótta, breytist í Hulk til að ganga frá árásarmönnunum og vaknar svo nakinn í frumskógum Guatemala.

Banner hefur verið að leita leiða til að útrýma risanum ógurlega með því að gera alls konar tilraunir með eigin blóð. Vísindamaður frá New York sem hefur verið að aðstoða hann óskar eftir nánari upplýsingum um það hvernig Banner breyttist í Hulk. Banner heldur til Virginia háskóla þar sem hann starfaði áður, í leit að upplýsingum úr tölvukerfinu þar. Við leitina rekst hann á gömlu unnustu sína, Betty Ross (Liv Tyler) sem er dóttir hershöfðingjans sem hundeltir hann, og ástin blómstrar á ný.

En Ross hershöfðingi kemst að því hvar Banner heldur sig, og ræðst til atlögu, en nú með erfðabættan Blonsky í broddi fylkingar. 

The Incredible Hulk er afar vel gerð mynd á sjónræna sviðinu, og slagsmálaatriðin eru gífurlega flott og skemmtileg. Edward Norton er frábær í sínu hlutverki og einnig er mjög gaman að þeim William Hurt og Tim Roth. Hins vegar er ljóst að myndin hefur verið klippt illa af framleiðendum, sjálfsagt til að stytta hana, en það vantar brot hér og þar í söguþráðinn, nokkuð sem veikir myndina töluvert. 

The Incredible Hulk er önnur Marvel mynd sumarsins og hún er góð, en ekki jafn nálægt fullkomnun og hin snilldarlega vel gerða Iron Man. Reyndar birtist Robert Downey Jr. sem Tony Stark í stuttu atriði og tengir myndirnar þannig skemmtilega saman.

Þessi útgáfa af risanum græna er mun betri en draslið sem kom frá Ang Lee árið 2003, þar sem blandað var inn hugtökum sem höfðu ekkert að gera við söguheim Hulk. Reyndar er eitt smá hneykslismál tengt þessari mynd. Edward Norton endurskrifaði handrit myndarinnar, en er ekki getið sem einn af höfundum sögunnar vegna þess að hann er ekki skráður í rithöfundasamband Bandaríkjanna. 

Þá veistu það.

 

Leikstjóri: Louis Leterrier

Einkunn: 7

Myndir: Rottentomatoes.com

Athugasemdir

[Birgir Eiríksson (IP-tala skráð) 19.6.2008 kl. 10:54]

Alltaf gaman að glugga á kvikmyndadómana þína, og btw ég þyrfti að komast á námskeið hjá þér í tímastjórnun.  Hafðu það gott.
kv, Biggi

[Hrannar Baldursson, 19.6.2008 kl. 12:46]

Biggi: Takk fyrir það, en af hverju námskeið í tímastjórnun?

Einar: Jú, það er stutt í Dark Knight. En það er bara ekki það sama að skella sér í bíó hérna í Bandaríkjunum og á Íslandi. Það er meira en helmingi ódýrara inn, engin hlé, enginn texti, salirnir hreinir og lykta ekki eins og í rafmagnslausum ísskáp, og mynd+hljómgæði 100%.

[Hlynur Gudlaugsson (IP-tala skráð) 26.6.2008 kl. 10:13]

Fínir pistlar hjá þér:-)

En ég er algerlega ósammála þér mð Hulk frá 2003. Hún er í raun miklu betur útfærð mynd og handritið svo mörgum hæðum fyrir ofan nýju myndina. Leikaravalið er ekki jafn gott en þó fyrir utan Edward Norton, Hinsvegar var Bana alls ekki svo slæmur.

Nýja myndin er miklu meiri poppkornsmynd heldur en 2003 útgáfan og sést það best í handritsgerð, leik og hvernig myndinni er skipt. William Hurt t.d. bara virkar ekki hlutverki Ross. Þó svo Ang Lee myndin hafi ekki verið verið heilalausu movie goers að skapi að þá var hún fjarri því að vera léleg, eiginlega betri en nýja myndin þegar maður leggur þær saman. Þú fékkst þó karaktersköpun, sögu og dýpt sem er hreinlega ekki til í nýju myndinni.

En alltaf gaman að hafa skoðanir:-) Haltu áfram að krítíka myndir fyrir okkur movie nördana:-)

PS. Hvernig fannst þér Transformers?

[Hrannar Baldursson, 26.6.2008 kl. 15:15]

Hlynur, við skulum vera sammala um að vera ósammála um Hulk frá 2003, því að mér fannst þessi nýja gáfulegri en sú gamla, einfaldlega vegna þess að hún var ekki að flækja söguna með pælingum sem komu teiknimyndasöguhetjunni Hulk nokkuð við. Hefði hún heitið eitthvað annað, eins og t.d. Rockman, þá hefði maður kannski fílað hana betur.

Mér fannst Transformers ekki góð.