Spaugstofan og siðferðisþroski

Eftir að Spaugstofumenn birtust með háði og spotti á laugardagskvöldið hafa fjölmargir þyrlað ryki yfir almenning og í augu hans með því að átelja grínarana fyrir lágkúrulega árás á Ólaf borgarstjóra og geðsjúka, en gleymt því að ráðamenn hafa sýnt þegnum sínum enn verri lítilsvirðingu, og það í verki. Stutt er að minnast á dómararáðningamálið, þar sem farið var eftir lögum en gegn anda laganna, þar sem sitjandi dómsmálaráðherra sýndi því miður lágan siðferðisþroska með slökum rökstuðningi fyrir ákvörðun sem var byggð á duttlungum og pólitík.

Enn styttra er að minnast á yfirtöku sjálfstæðismanna á borginni með Vilhjálm Þ. Vilhjálmsson og Ólaf flokklausa en þar nýtti fólk rétt sinn til friðsamlegra mótmæla með því að mótmæla fjandsamlegri yfirtöku á sjálfri Reykjavíkurborg, en áður hafði Vilhjálmur hrökklast frá völdum eftir eigin mistök og sýnt að hann valdi ekki starfinu. Þá var reynt að þyrla ryki í augu almennings og yfir hann með að gagnrýna fólkið sem mætti á palla til að mótmæla harkalega því óréttlæti sem það hefur upplifað síðustu daga. Það er þeirra réttur, og geta ekki kallast óspektir þar sem enginn  framdi eða hótaði ofbeldisverkum.

Að mínu mati er öll gagnrýni á siðgæðisvitund Spaugstofumanna marklaus, þar sem Spaugstofumenn hafa engin völd í þjóðfélaginu önnur en að kitla hláturtaugar okkar þegar vel tekst til, hið svokallaða fimmta vald. Við vitum vel að það er engin nauðsyn að taka þá alvarlega og að hver og hvað sem er getur orðið að skotmarki þeirra. Það að geðsjúkdómar séu orðið eitthvað tabú í dag réttlætir enn frekar að Spaugstofumenn taki slíka sjúkdóma fyrir, enda eiga geðsjúkdómar ekki að vera neitt tabú - menn eiga ekki að þurfa að skammast sín fyrir þá.

Ef Spaugstofumenn halda nú rétt á spöðunum ættu þeir að geta gert úr þessu klassískt efni, því að nú mun öll þjóðin fylgjast með þeim á næsta laugardegi, og þora þeir vonandi að ganga jafnlangt og Monty Python gerði forðum daga á BBC, og í stað þess að draga sig til baka og biðjast afsökunar, hæðast að landanum með meiri krafti en nokkru sinni fyrr.

Svo get ég ekki annað hrósað gömlum skólafélaga úr Breiðholtinu Erlendi Eiríkssyni, sem túlkaði Ólaf snilldarlega í þessum þætti.

Athugasemdir

[Ómar Ingi, 29.1.2008 kl. 20:12]

Var þetta ekki bara Geðveikt fyrir þá hafa húmor fyrir Spaugstofunni á annað borð!.

Sá þetta ekki og hef engan áhuga á ekki af því að enhver var móðgaður eða ekki móðgaður heldur bara vegna þess að þessir herramenn hafa ekki verið fyndnir í ansi mörg ár.

En þeir hafa getað sýnt fram á áhorf gaman verður að sjá hvort að það breytist með rafrænum skoðunakönnunum sem væntanlegar eru. 

[Theódór Norðkvist, 29.1.2008 kl. 20:37]

Þetta er það sem ég er alltaf að benda á:

Heill her af talsmönnum valdaræningjanna í borginni er búinn að fylla nánast bloggsvæði mbl.is af hneykslunargreinum um óþroskaða menntaskólanema og nærgöngula grínista, til þess eins að aðalatriðið komist ekki að:

Valdarán Sjálfstæðisflokks og Ólafs F. í borginni með svikum, lygum og bellibrögðum.

[Ásdís Sigurðardóttir, 29.1.2008 kl. 21:28]

Mér fannst þetta nú bara eins og meðal góð spaugstofa, horfi oftast enda orðin fimmtug og þetta er ávani. Mér finnst ekkert ljótt við þetta grín, maður hefur nú séð ýmislegt. 

[Brjánn Guðjónsson, 29.1.2008 kl. 21:53]

Ómar. Ef þú horfðir ekki og ert þ.a.l. ekki bær að meta fyndni þessa þáttar 

[arnar valgeirsson, 29.1.2008 kl. 23:04]

ég er þér nú bara alveg sammála, hrannar. jebbs, ekki orð um það meir.

[Guðrún Markúsdóttir, 29.1.2008 kl. 23:32]

Alveg sammála. Og Spaugstofumenn eru toppmenn!

[Sævar Einarsson, 30.1.2008 kl. 00:30]

Góður pistill og spaugstofan var GEÐveikt fyndinn um síðustu helgi og vonandi verður hún það næstu helgi og lengur.

[Svanur Sigurbjörnsson, 30.1.2008 kl. 01:34]

Ég get sagt það 6527 sinnum að þetta er flottur pistill hjá þér Hrannar.  - skák og mát!

[Valdemar (IP-tala skráð) 30.1.2008 kl. 12:41]

Þeir sem vaða yfir folk a skítugum skónum verða bara að sætta sig við að fá á sig slettur.Ólafur er þar engin undantekning.

[Gulli litli, 30.1.2008 kl. 14:12]

Geðveiki má lækna en heimska er ólæknandi

[Þorsteinn Valur Baldvinsson, 30.1.2008 kl. 16:18]

Gagnrýnendur spaugstofu gríns eru hræsnarar

[Gísli Hjálmar , 30.1.2008 kl. 16:33]

... ég ætla að leyfa mér að vera sammála því að þessar árásir á Spaugstofuna finnst mér ansi langt sóttar - af þeim sem nenna að sækja það á annað borð.

[Hrannar Baldursson, 30.1.2008 kl. 20:26]

Gaman að fá svona margar athugasemdir. Takk fyrir það!