Guillermo Del Toro leikstýrir The Hobbit eftir J.R.R. Tolkien

Eins og flestir vita er The Hobbit forsaga The Lord of the Rings, sem Peter Jackson leikstýrði við fádæma undirtektir. Þar sem að Peter Jackson er fastur í öðrum stórverkefnum, meðal annars leikstjórn og framleiðslu á Tinna, ásamt Steven Spielberg, hefur Jackson samþykkt að vera framkvæmdastjóri verkefnisins (executive producer ef ég skil það hlutverk rétt).

Ég man þegar fyrst var tilkynnt að Peter Jackson myndi leikstýra The Lord of the Rings, þá tók hjarta mitt kipp, enda þekkti ég hans eldri myndir og vissi að hann smellpassaði sem leikstjóri. Ég skrifaði meira að segja ritgerð um þetta val á writtenbyme.com, þar sem ég skrifaði greinar í nokkur ár. Þar voru margir í vafa um hvort ég hefði rétt fyrir mér. Eflaust eiga einhverjir eftir að efast um del Toro fyrir The Hobbit, en ekki ég.

Verið er að ræða við mexíkóska leikstjórann Guillermo del Toro um að leikstýra The Hobbit, og verður hún þá gefin út í tveimur hlutum sem teknir verða upp samtímis. Að mínu mati er þetta einfaldlega frábært val á leikstjóra, enda hefur del Toro sýnt frábært vald á sögum sem krefjast einhvers myrkurs og húmors samtímis. Allar myndir hans hafa þó ekki slegið í gegn, og þar á meðal Hellboy, sem samt á sína góðu spretti, og Blade II. Aftur á móti gerði hann hinar stórkostlegu dramahrollvekju El Espinazo del Diablo (Mæna Djöfulsins) og hina frábæru El Laberinto del Fauno (Völundarhús Pans). Ég hef lesið The Lord of the Rings á tíu ára fresti síðan ég var sextán ára gamall, og The Hobbit oftar.

The Hobbit fjallar um ævintýri Bilbo Baggins, gamla frænda Frodo. Galdrakarlinn Gandálfur býður þrettán dvergum í heimsókn til Bilbós, en þeir þurfa að fá hann með sem þjóf í leit að fjársjóði sem varinn er af drekanum Smaug. Bilbo er ekkert sérstaklega hrifinn af ævintýrum, og er meira fyrir að sötra te, en hann lætur sig hafa það og slæst með í hópinn. Áður en hann veit af er hann farinn að berjast við risakóngulær, tröll, orka og úlfa, Gollúm og drekann ógurlega klóka, auk þess að hann þarf að takast á við óvænt vandamál í eigin hóp. Endar bókin á eftirminnilegu stríði á milli fimm herja.

Nú getur maður farið að hlakka til.

 

Teikningarnar eru eftir Alan Lee, af vefsetrinu TheOneRingNet

Athugasemdir

[Ásthildur Cesil Þórðardóttir, 28.1.2008 kl. 21:05]

En gaman að heyra, Tolkien er í miklu uppáhaldi hjá mér allt frá því að ég las Hobbitinn.  Þetta eru frábærar bókmenntir, og myndirnar um Hringadróttinssögu voru hreint frábærar.  Það er því sérstakt fagnaðarefni fyrir mig að fá þessar fréttir.  Takk fyrir það.

[Ásdís Sigurðardóttir, 28.1.2008 kl. 21:10]

Þetta er snilldar ævintýri. Geggjaðar teikningar með miklu innihaldi.

[Garðar Valur Hallfreðsson, 29.1.2008 kl. 09:26]

Ég er gríðarlega spenntur enda mikill aðdáandi bókanna ásamt myndanna.  Sammála með gott val á leikstjóra!

[Einar Jón, 29.1.2008 kl. 12:55]

Ég hlakka til -> nú getur maður farið að hlakka til.

Kann enginn íslensku lengur?

Annars er þetta örugglega hið besta mál, og betra en bíða í 1-3 ár eftir að Peter Jackson hafi tíma. Ég var líka einn af frekar fáum sem hafði fulla trú á honum sem leikstjóra LOTR, sá "Bad taste" fyrst fyrir 14-15 árum og eyddi miklum tíma í að finna gömlu myndirnar hans á VHS.

[Hrannar Baldursson, 29.1.2008 kl. 13:10]

Takk fyrir athugasemdirnar.

Einar Jón: Líklega fer maður um mann frá manni til manns eitthvað að förlast í íslenskunni þegar maður um mann frá manni til manns notar ensku (í vinnunni) og spænsku (heima) jafnmikið og móðurmálið.

Að alhæfa um íslenskukunnáttu allra útfrá afglöpum þrítengds bloggara er eins og að halda því fram að Spaugstofumenn hafi gengið of langt á Laugardaginn var.  

[Steingerður Steinarsdóttir, 29.1.2008 kl. 15:30]

Ég er mikill Tolkien-aðdáandi eins og þú en verð að segja að ég á erfitt með að sleppa þeirri hugmynd að Peter Jackson leikstýri Hobbit því mér fannst hann gera svo stórkostlega hluti með The Lord of The Rings. Ég hef séð Pans Labyrinth og fannst hún meiriháttar svo sennilega er þetta íhaldssemin í mér.

[Einar Jón, 29.1.2008 kl. 16:22]

Hrannar: hér á blog.is er nánast undantekning að sjá rétt fall á 3. persónu nafnorði með sögnunum að hlakka/vanta. Ég hef bent á þetta víðar.

Annað sem fer í taugarnar á mér hvað margir á blog.is klúðra beygingum á nafnorðunum faðir/móðir/bróðir/systir/dóttir, þó það sé í raun jafn einfalt í beygingu og afi/amma.

Ég hlýt að vera orðin gamall fyrst ég nöldra svona mikið... 

[Hrannar Baldursson, 29.1.2008 kl. 17:06]

Steingerður, ég held að del Toro sé jafn gott val í dag fyrir The Hobbit og Jackson var fyrir tíu árum fyrir The Lord of the Rings.

Einar Jón: Blogg eru náttúrulega þannig í eðli sínu að fólk eyðir sem minnstum tíma í prófarkarlestur. Í blogginu skiptir mestu að fólk geti tjáð sig, og þá að málfarið sé ekki 100% þá komast skoðanir þess samt að. Þar sem ég starfa við útgáfu get ég sagt þér að ef ég færi eftir þeim stöðlum við bloggið sem ég fylgi í vinnunni, þá kæmi lítið frá mér. En takk samt fyrir íslenskuráðgjöfina. Af virðingu við þig lagfæri ég villuna.