Systir mín á forsíðu Fréttablaðsins um Internetsjónvarpsstöðina WaveTV

Þegar ég skoðaði forsíðu Fréttablaðsins í dag (Mogginn kom ekki út) fannst mér ég sjá kunnuglegt andlit. Ég lagfærði aðeins gleraugun og pýrði á myndina. Jú! Var þetta ekki systir mín á forsíðunni? Ég var fljótur að sækja símann og hringja í hana, en samtímis fletti ég upp á viðtalinu aftarlega í blaðinu.  Reyndar ætti ég ekki að láta svona lagað koma mér á óvart, myndir af henni hafa það oft birst í dagblöðum og sjónvarpi að þetta hlýtur að komast upp í vana einhvern daginn. Ekki fyrir mig samt.

Internetsjónvarpsstöðin WaveTV mun hefja útsendingar í maí árið 2007. Eins og nafnið gefur til kynna verða útsendingar fyrst og fremst á vefnum. Meðal dagskrárgerðarmanna er systir mín, Anna Brynja. Hún ætlar að halda utan um sjónvarpsþátt um afsnobbaða vínsmökkun. Þetta þýðir sjálfsagt að á morgun hendi ég á bloggið gagnrýni á Sideways, einni fyndnustu vínsmökkunarkvikmynd allra tíma.

Úr Fréttablaðinu 7. apríl 2007:

Á meðal þáttanna sem verða í boði á wave tv er vínþáttur í umsjón Önnu Brynju Baldursdóttur. Anna Brynja er lærð leikkona frá Rose Bruford College, og mun útskrifast sem leiklistarkennari frá LHÍ í vor. „Við ætlum svona að taka snobbið úr vínmenningunni. Hugmyndin er komin frá mér og kærastanum mínum. Hann er vínsérfræðingur, og ég er oft dálítið týnd í þessu," sagði Anna og hló. „Ég á eftir að koma með spurningarnar sem enginn þorir að spyrja. Þetta verður fræðsla í svona léttgeggjuðum dúr. Svo ætlum við líka að skoða hvernig vín er gert, ræða við alþingismenn um léttvínsfrumvarpið og heimsækja vínskólann, svo eitthvað sé nefnt," útskýrði hún. Anna segir þáttinn því verða tilvalinn fyrir fólk sem vill kynna sér grundvallarreglur í vínsmökkun og öðru, án þess að þurfa að fara alveg á kaf. „Þetta verður á mannamáli, sem vill nú oft á tíðum vanta í vínþætti. En þeir sem halda að þeir viti allt um vín munu líka hafa gaman af þessu," sagði hún.

Athugasemdir

[Jóna Á. Gísladóttir, 8.4.2007 kl. 09:57]

Hún er flott!

[Sigfús Sigurþórsson., 8.4.2007 kl. 10:11]

Glæsileg systir og til hamingju með hana Hrannar. Gleðilega Páska Hrannar og þín fjölskilda.

[Sóldís Fjóla Karlsdóttir, 8.4.2007 kl. 12:58]

Fylgist með kvikmyndarýninni þinni og finnst hún gott mál. Glæsileg systir, þú mátt vera stoltur. Gleðilega Páska, til þin og þinna.

[Ásdís Sigurðardóttir, 8.4.2007 kl. 17:00]

Sæt systir. Tók einmitt eftir henni og viðtalinu í blaðinu í gær.

[Oddur Ingi (IP-tala skráð) 8.4.2007 kl. 17:48]

brilliant!

[Heiða Þórðar, 8.4.2007 kl. 17:55]

Flott hún systir þín! þú ert nú ekki svo slæmur sjálfur.

[Hrannar Baldursson, 8.4.2007 kl. 22:54]

Takk fyrir þetta! Ég er stoltur af systur minni. Engin spurning. Og Heiða: Takk

Villi geit eða Villigeit: Hún er eldklár, þó að það sé ekki við skáklistina sem hún brýnir hugann. Skemmtileg ferskeytla annars.

Tómas Örn: Þarna náðirðu mér. Ætli þetta sé ekki bara sú eina sem ég hef séð? Þannig að samkeppnin um fyndnustu vínsmökkunarkvikmynd allra tíma virðist frekar ósanngjörn. Annars eru til ágætis myndir um alkóhólisma, eins og The Lost Weekend, sem eru reyndar alls ekkert fyndnar - og tengjast meira vínþambi en smökkun.

[Hafliði Ingason (IP-tala skráð) 8.4.2007 kl. 23:06]

http://www.metacafe.com/watch/290733/borat_wine_tasting/

Innlegg frá lærifaðir okkar ...

kv. Sancho

[Hrannar Baldursson, 8.4.2007 kl. 23:30]

Gleðilega páska Sancho! Jú, ljóst er að Borat tekst að taka snobbið úr vínsmökkuninni.

[Hafrún Kristjánsdóttir, 9.4.2007 kl. 20:35]

Flott.  Þetta er þáttur fyrir mig.  Mér hefur alltaf langað að segja eitthvað gáfulegt þegar ég smakka á rauðvíni í matarboði en það hefur aldrei tekist.  Kannski læri ég gáfulega frasa þarna :)

[Hrannar Baldursson, 9.4.2007 kl. 22:06]

Hafrún: ég játa að sjálfur hef ég nákvæmlega ekkert vit á rauðvíni, samt smakkaði ég eitt gott um daginn - man bara ekki hvað það heitir... (ég er á þessu leveli) og er sammála því að áhugavert verður að fylgjast með þessum þáttum.