Kemur ríkisstjórnin með aðgerðarpakka fyrir heimilin sem tekið verður fagnandi?

Boginn hefur verið þaninn mikið og kominn tími fyrir langþreytta landsmenn af klassanum venjulegt fólk að fá góðar fréttir.

Þegar maður heyrir um aðgerðarpakka sem þennan veit maður ekki við hverju má búast, en þetta er það sem ég vona; að komið verði til móts við fólk með afgerandi hætti, þannig að það geti losnað undan ólánum sínum á stuttum tíma.

Þær leiðir sem ég sé fyrir mér eru þessar:

• Niðurfelling verðtryggingar á húsnæðisólánum fyrir eitt heimili - þýðir að fólk sem skuldar í húsnæði getur aftur séð fram á bjarta tíma.
• Auknar verðbætur sem hafa hlutfallslegt gilidi miðað við verð á húsnæði og þeim vöxtum sem verið er að borga af ólánum.
• Aðgerðir vegna erlendra ólána - annað en sú hugmynd sem Lýsing hefur verið að kynna, sem felur í sér að frysting óláns til þriggja mánaðar kostar 7000 kall, það þarf að borga helminginn og að ólánstíminn lengist um þrjá mánuði.

Aðal málið finnst mér að finna leiðir sem gera duglegu fólki mögulegt að eiga þak yfir eigin höfuð, fararskjóta, skjólfatnað og mat. Og að það fái tækifæri til að byggja upp eigin velferð og velja úr kostum til framtíðar.

Þetta er mín von.

Aðgerðaáætlun kynnt í dag

Athugasemdir

[Ómar Ingi, 14.11.2008 kl. 09:55]

Brostu með mér

http://ommi.blog.is/blog/ommi/entry/710919/

[Magnús Sigurðsson, 14.11.2008 kl. 11:01]

Látum okkur dreyma.

[Steingerður Steinarsdóttir, 14.11.2008 kl. 11:55]

Frábærar tillögur hjá þér. Þetta er einmitt það sem þarf að gera.

[Jón V Viðarsson, 14.11.2008 kl. 23:17]

Er það ekki IMF sem ræður í dag. Það er ekkert elsku mamma á þeim bæ. !

[Kristbjörn H. (IP-tala skráð) 16.11.2008 kl. 19:23]

Sæll Hrannar. Þú afsakar að ég skrifi þér hérna nokkrar línur, mér er nú svo flökurt að ég veit vart hvað skal til  bragðs taka. Fyrir skammri stundu sá ég í fréttum að ríkisstjórn Íslands hafi samið við Breta og Hollendinga um uppgjöf í Icesave kúguninni. Þar var samþykktur óútfylltur tékki fyrir breska og heollenska innistæðueigendur gegn því að verðlausar eignir Landsbankans væru settar uppí. Ég, þú, íslenska þjóðin og ófæddir afkomendur okkar eiga sem sagt að greiða fyrir stjórnleysi, eftirlitsleysi, fjármálaóreiðu, svik, þýfi, blekkingar örfárra einstaklinga og ráðherra. Við erum ofurseld lýðskrumurum. Veitir enginn því athygli að í tilkynningu ríkisstjórnarinnar stóð að ekki væri vitað hver upphæði væri sem þjóðin þarf að greiða? Getur einhver viti borinn einstaklingur samið á þann hátt? Myndi einhver semja við byggingameistara um að láta hann byggja hús fyrir sig og borga svo þegar húsið væri klárað, það verð sem meistarinn vildi fá? Eru menn gengnir af göflunum hérna?

Með þessu er verið að segja: Bretar og Hollendingar beittu áhrifum sínum í IMF til að kúga okkur til uppgjafar. Ætli það sé búið að segja Geir Haarde það tvisvar? H vað les maður í fréttum? Að umsóknin til IMF hafi gleymst! Það var svo sorglegt að horfa á Spaugstofuna gera grín að þessu

Vissulega finn ég til með breskum og hollenskum sparifjáreigendum og vil að þeir fái sínar innistæður. En ég ætla ekki að borga þær meðan Björgólfur Thor Björgólfsson á enn Actavis, fyrirtæki sem metið er á 600 milljarða króna! Eða Straum fjárfestingabanka! Eða Novator! Og ég ætla heldur ekki að borga innistæðurnar meðan Björgólfur Þór Guðmundsson á West Ham! Eða Eimskip! Og ég ætla heldur ekki að borga meðan Sigurður Einarsson og Heiðar Már þurfa ekki að greiða Kaupþing banka skuldirnar fyrir hlutabréfabrask sitt! Og ég greiði ekki krónu meðan Jón Ásgeir Jóhannesson kaupir hér hvern fjölmiðilinn af öðrum og á enn Bónus! Og ég greiði heldur ekki krónu meðan ríkisstjórnin greiðir 11 milljarða í Glitnissjóð 9 og reynir þannig að breiða yfir misgjörðir þeirra sem sátu í stjórn sjóðsins. Einhver myndi segja: Dýr mundi Illugi allur! Ríkisstjórnin ætlast til að við greiðum skuldir þessara manna. En ég ætla ekki að greiða hana. Ég ætla að krefjast þess og berjast fyrr að eigur þeirra verði gerðar upptækar og notaðar til að greiða breskum og hollenskum sparifjáreigendum. Þurfi að leita þá uppi um víða veröld þá skal það gert. Ég læt börn þjóðar minnar ekki gjalda fyrir gjörðir örfárra einstaklinga og óvita í ríkisstjórn.

Með "samkomulaginu" er búið að viðurkenna aðför Breta á Landsbankann hafi verið fullkomnlega réttmæt, þvert á það sem ráðamenn sögðu þjóðinni. Bretar hefðu aldrei tekið yfir Landsbankann ef þeir tryðu að eignir hans hefðu dugað vel fyrir skuldum. Það hlýtur því að liggja í augum uppi að eignirnar voru ekki nærri eins verðmætar og bankinn gaf upp. Hafi Bretar séð að eignir bankans hafi dugað fyrir innistæðum þá hefðu þeir aldrei gert aðför að bankanum. Bretarnir vissu að viðskiptaráðherra sagði þeim ósatt um ástand bankanna, bæði rétt áður en þeir hrundu og líka í vor þegar gjaldeyrir þjóðarinnar var að verða búinn. Hins vegar blekktu íslenskir ráðherrar þjóðina og tóku undir með fjárglæframönnunum og sögðu Breta vera vonda við þá. Ráðherrar Íslands létu taka sig í það ósmurt og virðist greinilega líka það. Þeir eru ekki að gæta hagsmuna minna né íslensku þjóðarinnar og ég segi hér og nú að þeir sitja ekki í mínu nafni!

Getur einhver á þessari stundu, með réttu ráði, sagst vilja fara í ESB með þjóðum eins og Bretum og Hollendingum eftir álíka aðför og kúgun sem þeir hafa sýnt okkur? Samt hamast stjórnmálaflokkarnir við að breyta skoðunum sínum til að komast þar inn sem fyrst. Af hverju? Jú svo við fáum ekki að vita hve ástandið sé í raun alvarlegt.

Ég er búinn að fá nóg. Gjörsamlega nóg. Það er búið að ganga fram af mér. Ég er með óbragð í munni og sting í hjarta. Búið er að svipta mig ærunni útí hinum stóra heimi og nú stend ég einn. Ríkisstjórnin hefur svikið mig og selt börnin mín. Aldrei þessu vant er ég orðlaus, hjartað kramið og heilinn dofinn. En ég svet þess dýran eið að berjast með öllum tiltækum vopnum að falli ríkisstjórnar þeirrar sem sveik íslensku þjóðina og svipti hana hér með umboði mínu!

[Hrannar Baldursson, 16.11.2008 kl. 20:06]

Sæll Kristbjörn,

Ég finn til mér þér, sjálfum mér og íslensku þjóðinni, en það er rétt hjá þér að við þurfum að greiða upphæð sem enginn veit hver er og gæti hugsanlega tekið marga mannsaldra að greiða. 

Öll kurl eru samt ekki enn komin til grafar. Að setja hryðjuverkalög á Landsbankann var hugsanlega réttlætanlegt af Bretum, en við eigum sams konar lög hér heima sem heita bara öðru nafni: Lög um peningaþvætti. 

Vitleysa okkar Íslendinga er að setja samasem merki á milli bankanna og þjóðarinnar. Þetta voru fyrirtæki í einkarekstri!

Það verður áhugavert að vita upp á hvað við getum boðið framtíð okkar þegar kemur að efnislegum gæðum. 

Við eigum þó ennþá menningararfinn okkar og tungumálið. 

[Kristbjörn H. (IP-tala skráð) 16.11.2008 kl. 21:54]

Samasemmerkið milli einkabanka og þjóðarinnar er óskiljanlegt í þessu sambandi: Bankastjóri/ar Landsbankans ákveða að stofna sparireikninga í Bretlandi. Þeir klúðra því og setja bankann á hausinn. Ég, sem er ekki einu sinni viðskiptavinur Landsbankans á Íslandi! þarf að borga fyrir það og ekki nóg með það heldur börnin mín líka! Þetta er það sem er að fara gerast og ríkisstjórnin samdi um!

Við eigum menningararf og tungumálið. Við eigum ómetanlegan mannauð. Við eigum glæsilega sögu. Við erum vopnlaus og friðsöm þjóð. Við eigum fullkomið heilbrigðiskerfi. Við eigum stórkostlegt fagfólk á öllum sviðum. Við eigum bestu fiskimiðin. Við eigum ómengaða náttúru. Við eigum líka börn sem ég vil að erfi allt það sem duglegt og heiðarlegt fólk byggði í þessu landi. Þann arf vil ég skilja eftir mig.

[Pétur Kristinsson, 18.11.2008 kl. 15:35]

Ég er með nokkrar lausnir fyrir þjakaða landsmenn.

1) Að hætta að borga af húsnæði og láta bankana taka í stórum stíl við húsnæði og þá sitja þeir uppi með mest allt íbúðarhúsnæði landsins og þá er hægt að pressa á þá að leigja húsnæðið út á lágu verði.

2) Að kaupa heilsíðuauglýsingar í stórum dagblöðum erlendis og birta myndir af fyrrum eigendum bankana og kynna þá sem þá menn sem ábyrgð bera raunverulega á því hverjir komu icesave í svaðið og þá geta þessir menn ekki labbað óhultir um borgir erlendis ef þeir ætla að stinga héðan af með "auðinn" sinn.

3) Halda áfram mótmælum gegn núverandi stjórnvöldum og gera þeim grein fyrir því að við ætlum ekki að borga af annara manna klúðri. Af hverju eigum við að borga af skuldum þessara manna þegar að við vitum af þeim í milljarða húsum erlendis á rándýrum bílum með rándýr sumarhús. Þessa menn á strípa inn að beini svo má fara að ræða um ábyrgð ríkisins.

4) Breyta lögum og stjórnarskrá á þann veg að hægt sé að sækja þessa menn til saka og jafnvel þannig að athæfi sem átti sér stað í þessum fyrirtækjum fyrir 15-20 árum verði sakhæft í dag.

5) Að gera núverandi stjórnvöldum grein fyrir því að hækkanir á sköttum, vörum og öðrum gjöldum verða ekki liðnar af almenningi ef þessar hækkanir eru til þess gerðar til þess að koma útrásarvíkingum og öðru glæpahyski til bjargar. Fyrr skal ég fara að skoða þann möguleika að flytja frá mínu elskaða landi en að borga fyrir moldríka, útúrspillta glæpamenn.