100 ára kreppa?

 

Peningar í lausu lofti, frá College Scholarships

 

Þar sem ekki verður hægt að klára greiðslur á Icesave árið 2024 eins og fyrirvarar gerðu áður ráð fyrir, þá væri áhugavert að vita hversu langan tíma tekur að borga þessa reikninga, þessa reikninga sem er ein af grunnforsendum þess að ég ákvað að flytja úr landi, enda vil ég ekki taka þátt í að borga skuldir óreiðumanna, né að börn mín lendi í sömu súpunni.

Ennþá skil ég ekki af hverju þessari ríkisábyrgð er ekki algjörlega hafnað og farið á eftir þeim sem að græddu óhóflega á þessu, enda augljóst að peningarnir sem lánaðir voru bankanum hafa ekki bara gufað upp, þó að þeir sem haldi þeim í dag takist að leyna þeim og virðist ætla að komast upp með glæpinn á kostnað íslensku þjóðarinnar, að minnsta kosti í bili.

Peningar gufa ekki bara upp, frekar en að þeir vaxa á trjánum.

Ríkisstjórnir ólíkra landa eiga ekki að deila um hver borgar. Þær eiga að rannsaka hvert peningurinn fór og draga þá til ábyrgðar sem hafa svikið þessar háu fjárhæðir út úr saklausu fólki víða um heim. Mistök fyrri ríkisstjórnar var að tryggja skuldbindingar á innlendum innistæðum allra reikninga bankanna, sem gerði kröfur erlendra innistæðueigenda réttlætanlega. 

Það er búið að borga íslenskum innistæðueigendum til baka á kostnað skuldara, á kostnað ríkisstofnana, með hærri sköttum og með ófyrirsjáanlegum samdrætti næstu árin, með sköpun vinstri ríkisstjórnar sem virðist því miður engu skárri en sú hægri. Það er mikil skriða óréttlætis í gangi og það virðist erfitt að spyrna við henni.

Þessi skriða virðist hafa hafist með óstjórnlegri græðgi meðal þeirra sem áttu mikið og vildu ekki bara meira, heldur margfalt meira. Henni var haldið við eftir að bankarnir hrundu með því loforðið ríkisstjórnarinnar að þetta fólk myndi ekki tapa peningum sínum af innlendum reikningum, og hefur orðið til þess að erlendir eigendur geri að sjálfsögðu sömu kröfu, enda afar varhugavert að gera upp á milli fólks í alþjóðlegu viðskiptaumhverfi vegna þjóðernis þess eða búsetu.

Það sem vantar er réttlæti, kalt og hart. 

Icesave-fyrirvörum breytt

Athugasemdir

[Jakob Falur Kristinsson, 18.10.2009 kl. 08:41]

Það er nýbúið að gera upp við alla bankastjóra gömlu bankanna, bæði laun í uppsagnafresti og alla þá bónusa sem þessir menn höfðu samið um.  Við uppgjörið var miðað við þau ofurlaun sem þessir menn voru á.  T.d. fékk Hreiðar Már Sigurðsson laun í 6 mánuði og voru mánaðarlaun hans 20 milljónir og síðan fékk hann einhver slatta af peningum  fyrir bónusa.  Fyrrum bankastórar gamla Landsbankans fengu greiddan sérstakan bónus fyrir hina snjöllu viðskiptahugmynd sem kallast Ivesave.  Þetta voru í allt hátt í einn milljarð og var framkvæmt af skilanefndum bankanna, en farið hljótt

[Jakob Falur Kristinsson, 18.10.2009 kl. 08:43]

Ég ætla að bæta aðeins við, sem er að engum datt í hug að kyrrsetja þessa peninga.

[óli (IP-tala skráð) 18.10.2009 kl. 09:07]

Og hvað á maður að gera ef maður sér þennan bankastjóraviðbjóð á götunum!??

[Jóhannes Laxdal Baldvinsson, 18.10.2009 kl. 09:41]

Hrannar við fáum ekkert réttlæti. Íslandi er stjórnað af skilanefndum bankanna og þar ráða bara lögfræðingar. enuff said!

[Hrannar Baldursson, 18.10.2009 kl. 11:35]

Jakob Falur: afar sorglegt ef satt reynist. Ótrúlegt hvernig hægt er að reikna arð í prósentum sem nemur milljónum þrátt fyrir margra milljarða tap.

Óli: Góð spurning. 

Jóhannes Laxdal: Lögfræðingar eru ekki það sama og lagatæknar, en hinir síðarnefndu virðast tröllríða samfélaginu og þykjast vera lögfræðingar. Það fær enginn réttlæti upp í hendurnar, fólk verður að berjast fyrir því með kjafti og klóm, og krefjast þess af mikilli staðfestu. Það þarf líka að vita um hvað það er að biðja. Því miður lítur út fyrir að á Íslandi hafi verið skapað skrímsli sem svo er notað af öðrum stærri skrímslum úti í heimi til að gera íslensku þjóðina að þrælum hins nýja og flata heims.