10 málshættir með kjánalegum útúrsnúningum

Það er stutt í páska og þá blómstrar málsháttamenning Íslendinga. Hefurðu pælt í því þegar þú heyrir málshætti að þó þeir hafi kannski eitthvað viskubrot, þá ganga alhæfingar þeirra sjaldan upp. 

Hér eru nokkur dæmi:

1. Að hika er það sama og að tapa, nema þegar þú stendur í marki og kastar þér á boltann áður en honum er sparkað.

2. Aðgát skal höfð í nærveru sálar, en trúirðu ekki á tilvist sálarinnar, hugsaðu um sjálfan þig, græddu eins mikið og mögulegt er og brostu þegar hagkerfið hrynur.

3. Af litlum neista verður oft mikið bál, nema þú sért að kveikja á eldspýtu í sturtu.

4. Af máli má manninn þekkja, en deila má um hvort það sé af ummáli, flatarmáli, kaffimáli eða frönskukunnáttu.

5. Aldrei er góðum liðsmanni ofaukið, nema liðið sé fullskipað.

6. Aldrei er góð vísa of oft kveðin, nema þegar þú setur hana inn í athugasemdakerfi allra blogga alla daga.

7. Auðkenndur er asninn á eyrunum, nema hann noti hjálm.

8. Allt tekur enda um síðir nema síður frakki sé.

9. Allt er vænt sem vel er grænt, nema það sé andlit í spegli á sunnudagsmorgni.

10. Allir hlutir eru svartir í myrkri, fyrir utan sálina, andardráttinn, sólina og óþolandi trommusláttinn í kjallaranum, vaxliti, sjálflýsandi leikföng og alls hins sem er ekki svart í myrkri.

 

Mynd: Softpedia

Athugasemdir

[Kristbjörn H. (IP-tala skráð) 7.4.2009 kl. 14:09]

hahahaha er að spá að tileinka mér þennan 9. sérstaklega, fæ ég leyfi hjá þér til að nota hann sem lífspeki mína í nánustu framtíð? hehehe;)

[k (IP-tala skráð) 7.4.2009 kl. 15:33]

vá voðalega lítið fyndið

[Ómar Ingi, 7.4.2009 kl. 19:07]

Slæmur dagur hjá k ? 

[Hrannar Baldursson, 7.4.2009 kl. 19:18]

Kristbjörn: Verði þér að því.

k: 'k!

Ómar: Þeir segja að þriðjudagir séu sumum erfiðari en mánudagar. Kannski þetta sé dæmi um það.