2. Don Hrannar skrifar frá Noregi: Veðrið eða verðið?

 

 

Það er tvennt sem sérstaklega hefur vakið athygli mína hérna í Noregi fyrstu vikuna: veðrið og verðið.

Veðrið hérna er eins og í eins og í Tinnabók eða ímynduðum minningum um æskusumar á Íslandi. Sólin skín flesta daga, himinninn blár með hvítum bómullarskýjum, vindurinn bærir varla trjákrónurnar. Dádýr skoppa um skóga. Fuglasöngur og rólegheit þegar kvölda tekur. Fólk hópast niður á strönd með veiðistangir. Það eina sem vantar eru syngjandi prinsessur umkringdar smádýrum að vinna húsverk.

Til samanburðar fannst mér ansi oft hvasst og blautt heima á Íslandi.

Verðið er hins vegar eitthvað sem manni er ráðlegt að bera ekki saman við Ísland. Ég geri það samt.

• Úti á bensínstöð kostar pulsa með hálfum lítra af kók 56 krónur á tilboði, eða um 1100 krónur íslenskar.
• Á sömu bensínstöð kostar mjólkurlítri 20 krónur, eða 400 krónur íslenskar.
• Það kostar um kr. 30 í strætó, eða kr. 600.
• Í bíó kostar um kr. 90, eða 1800 krónur!

Athyglisverður munur. Ég reyni að huXa ekki um þetta.

Atvinnuumsóknir enn í gangi... meira seinna!

Athugasemdir

[Óskar Þorkelsson, 5.5.2009 kl. 12:09]

þetta lagast um leið og þú færð útborgað í norskum krónum ;)  að umreikna í isk er bara vitleysa því okkar gjaldmiðill er einskinsvirði

[Ásdís Sigurðardóttir, 5.5.2009 kl. 13:43]

Engin leið að umreikna eins og ástandið er núna, njóttu Noregs í botn.

[Sigurður Rósant, 5.5.2009 kl. 16:38]

Gaman að fylgjast með innleggjum þínum, Hrannar. En hvað eru örorkubætur eða atvinnuleysisbætur háar þarna, eftir skatta?

Með kveðju

[Ævar Rafn Kjartansson, 6.5.2009 kl. 00:44]

Segi eins og Óskar, láttu okkur vita þegar þú færð útborgað eða bætur hver munurinn er.

[Jóna Kolbrún Garðarsdóttir, 6.5.2009 kl. 01:48]

Ég er ekki hissa á því, ég hafði tvo stóra hópa af kennurum á barnum hjá mér nýlega frá Noregi og fannst þeim öllum mjög ódýrt að versla á barnum hjá mér.  20 manna hópur af raunvísindakennurum sem voru hérna á Íslandi í námsferð, voru að skoða orkuver.  Þau gáfu mér mesta "tips" sem ég hef fengið í mörg ár. 

[Pétur (IP-tala skráð) 6.5.2009 kl. 03:21]

Verðið er nú sennilega hvergi hærra en á bensínstöðvunum.

Af hverju verslar þú ekki við t.d. Rema1000 eða Kiwi?

[Hrannar Baldursson, 6.5.2009 kl. 06:21]

Óskar og Ásdís: rétt

Sigurður og Ævar: Ég hef ekki hugmynd um hvað örorkubætur og atvinnuleysisbætur eru háar. Vonandi þarf ég ekki heldur að komast að því. Ég er enn að taka út uppsafnað sumarfrí sem ég átti inni.

Jóna: Lýsandi dæmi.

Pétur: Rétt hjá þér að hæsta verðið er á bensínstöðunum, rétt eins og heima. Að sjálfsögðu versla ég í lágvöruverslunum eins og Rema1000 og Kiwi, en maður á nú líka leið hjá bensínstöðvum og þar sem hlutirnir eru vel verðmerktir þar er um að gera að leggja þá á minnið. Hvar ætli mjólkin eða kókið kosti á íslenskri bensínstöð? Hálfur líter af kók fer varla yfir 150 krónur, og mjólkin ekki heldur, í samanburði við 500 og 400 krónur í Noregi. Ég var ekki að leita eftir lægsta verði.

[Óskar Þorkelsson, 6.5.2009 kl. 11:30]

kók á íslenskri bensínstöð er um 180 kall síðast þegar ég fékk mér.. um síðustu helgi.

Nojarar hafa lög um verðlag á bensínstöðvum.. sem er eitthvað á þá leið að verðlag þar VERÐUR að vera hærra en á lokal sjoppu svo bensínstöðvarnar drepi ekki niður einstaklingsframtakið.. eins og á íslandi ;)